WENYE BAA DAR WAONYWA

Na Haruni Sanchawa

AFISA Utamaduni Wilaya ya Ilala jijini Dar, Shani Kitogo amewaonya wenye baa na pub kuzingatia sheria za nchi hasa wakati wa kufunga biashara zao.
Akizungumza katika kikao cha pamoja kilichokaa hivi karibuni kwenye Ukumbi wa Nyantare Tabata, afisa huyo alisema sheria lazima zizingatiwe.
“Uhalifu unasababishwa na watu wenyewe kwa kuwa hawazingatii sheria za nchi hasa wakati wa kufunga baa na pub.
“Ni kosa kubwa kwa mmiliki yeyote wa baa au pub kutozingatia muda uliowekwa wa kumaliza kazi zao kulingana na leseni yake ya biashara inavyosema, hivyo nasisitiza kuwa ni lazima sheria hiyo ifuatwe,” alisema Kitogo.
Naye Mwenyekiti wa Umoja wa Wamiliki wa Baa Wilaya ya Ilala, Francis Msonga alisema mikakati ya jeshi la polisi, Wilaya ya Kipolisi Buguruni ni mfano wa kuigwa kwa wilaya na mikoa mingine.
 Msonga aliyasema hayo wakati wa kikao hicho maalumu kwa ajili ya kuweka hali ya usalama katika maeneo yao ya biashara hasa mabaa yanayoonekana kuwa ni kero hasa nyakati za usiku.
Aidha, mwenyekiti huyo aliongeza kuwa ni jambo la kujivunia kwa Kamanda wa Polisi Wilaya ya Buguruni, SP Jiliyo Simba (pichani) kuitisha kikao hicho kwa lengo la kuwekana sawa.
Baadhi ya wadau hasa wamiliki wa baa hizo wamesema kuwa jeshi la polisi linajitahidi kufanya kazi zake lakini vitendea kazi havitoshi wakatoa mfano kuwa wilaya nzima ya Buguruni ina magari  mawili tu wakati matukio yanaweza kuwa mengi kwa wakati mmoja.
Kamanda Simba alisema lengo la kikao hicho ni kuhakikisha watu na mali zao zinakuwa salama.