Kiiza afufukia mazoezini Yanga!!

Na Khatimu Naheka

KIUNGO mshambuliaji wa Yanga, Mganda, Hamis Kiiza (pichani), juzi alionyesha uwezo mkubwa mazoezini na kufanikiwa kufunga mabao matatu ‘hat trick’.
Katika mazoezi hayo yaliyofanyika kwenye Uwanja wa Bora uliopo Kijitonyama jijini Dar es Salaam, yakiwa ndiyo ya kwanza baada ya kuichakaza Prisons kwa mabao 3-1 katika mchezo wa Ligi Kuu Bara uliopigwa wikiendi iliyopita, Kiiza alionekana kuwa na kiwango cha hali ya juu kilichowafurahisha mashabiki waliohudhuria.
Mazoezi hayo yaliyoshuhudiwa na Championi Jumatano yalianza kwa Kocha Mkuu, Ernie Brandts, kuwahenyesha nyota wake kwa kupasha misuli muda mrefu.
Baada ya kupasha misuli, Brandts aliwapumzisha nyota waliocheza kwa muda mrefu kwenye mchezo dhidi ya Prisons na kubaki na wale wa akiba ambao aliwagawanya katika vikosi viwili.
Kundi la kwanza lilikuwa na nyota kama Juma Abdul, Kabange Twite, Ladislaus Mbogo, George Banda, David Luhende, Godfrey Taita, Kiiza na Yusuph Abdul.
Lingine lilikuwa na nyota kama Said Bahanuzi, Stephano Mwasyika, Nizar Khalfan, Omega Seme, Shadrack Nsajigwa, Rehani Kibingu na Said Mohamed.
Timu ya akina Kiiza ilipata ushindi wa mabao 3-1, huku bao la kufutia machozi la ile nyingine likifungwa na Nizar.